safha-e-dil se tira naam mitane men mujhe der lagi
puuri ik umr ki der!
ashk-e-gham… qatra-e-khun… ab-e-masarrat se
mita kar dekha
rang-e-duniya bhi milaa… rang-e-tamanna bhi laga kar dekha
maktab-e-ishq men jitne bhi sabaq yaad kiye
yaad rahe
arsa-e-zist men khvabon ke kharabe the bahut
in kharabon men
khayalon ke nagar jitne bhi abad kiye
yaad rahe!
gosha-e-ranj men… hangama-e-duniya se pare
kaun ik hijr ke shishe men utarta tha
tire aks-e-dil-aram ke saath
kis ki ummid ke raste pe koi daera-e-nur na tha
kis ki mayus nigahon men bikharte the
tamanna ke ujale bhii… andheron ki tarah
roz-e-raushan men bhi ho jaati thi
kis dil ke mazafat men raat,
tu ne jaana hi nahin
aur tiri khud-sakhta be-khabari ko
qissa-e-dard sunane men mujhe der lagi
ansuon se mira aina-e-gham dhundlaya
ek sardaba-e-dauran men jo poshida-o-nadida rahi thi
ab tak
is tan-e-zar ko… vo zindagi hi bhuul gai
dil se lipti hui yak-rang udasi ke sabab
rang-o-ramish men basi zinda-dili bhuul gai
par tiri shakl bhulane men mujhe der lagi
puuri ik umr ki der
umr…
jo lamha-e-jan ke siva kuchh bhi na thi
umr… jo teri tamanna ke siva kuchh bhi na thi
bas vahi umr batane men… mujhe der lagi!
Leave a Reply