abhi raushan hui hain mere ghar ki battiyan mujh se
hava phir le na jaa.e chhin kar parchha.iyan mujh se
karun ankhon se nam miTTi ḳhalaon phuul raste men
taqaza kar rahi hain ḳhvahishon ki bastiyan mujh se
ye roz-o-shab ke hangame dar-o-divar ke andar
bata.un kya sulajhti hi nahin ab gutthiyan mujh se
kisi se muskura kar baat kar leta huun main jab bhi
na jaane kyon ḳhafa rahti hain teri khiḌkiyan mujh se
ye tanha.i ka mausam bhi dabe paanv guzar jaata
agar yaden kisi ki baanT letin talḳhiyan mujh se
vo barfile badan ke saath milne jab bhi aata hai
chura leta hai mere ḳhuun ki sab garmiyan mujh se
parinda ek din uḌ ja.ega TuTegi Tahni bhi
yahi kahti hain phulon ki bikharti patiyan mujh se
akela main jo ghar lauTa to phir kaise bata.unga
ḳhuda.i ka sabab puchhengi jab tanha.iyan mujh se
Leave a Reply