Is Zamin Par Us Ka Maskan Us Ka Ghar Lagta Na Tha

Mohammad Naim Jawed Naim

is zamin par us ka maskan us ka ghar lagta na tha

is qadar vo ḳhubsurat tha bashar lagta na tha

hijr ka maqtal ho ya suuli visal-e-yar ki

ik zamana tha kisi se koi Dar lagta na tha

jis qadar main thak gaya tha us ko tai karte hue

dekhne men is qadar lamba safar lagta na tha

duur mujh se kar diya kitna anaon ne use

mere shanon par laga mera hi sar lagta na tha

kar raha tha jis tarah sachchi mohabbat ki talash

aane vaale mausamon se be-ḳhabar lagta na tha

vo to us ne chhu liya ik din mohabbat se mujhe

varna mujh par phuul khilte the samar lagta na tha

jis qadar badnam tha shahr-e-vafa men vo ‘na.im’

bevafa pahli nazar men us qadar lagta na tha