Khwab Mein Gar Koi Kami Hoti

khvab men gar koi kami hoti

aankh muddat se khul chuki hoti

tum samundar men kis liye kuude

aag to yuun bhi bujh gai hoti

vo to dariya utar gaya varna

jaane basti pe kya bani hoti

vo sada raat ko jo aati thi

jagte rahte to suni hoti

de rahi hai mire badan ko duaen

raat akeli thithur gai hoti

an-ginat rang the nigahon men

koi tasvir to bani hoti

tum yunhi sochte rahe ‘abid’

umr yuun bhi guzar gai hoti

Leave a Comment