soch ki mauj-e-ravan le ke kidhar aa.i hai
ye samundar ka kinara hai ki gahra.i hai
kaun hai jis ne hila Daala mira saara vajud
meri avaz kis avaz se Takra.i hai
shohraten had se guzar jaa.en to ye dhyan rahe
mausam-e-namvari mausam-e-rusva.i hai
apne atraf bahut bhiiḌ ke hote hue bhi
main jahan huun vahan tanha.i hi tanha.i hai
us ke phaldar daraḳhton pe na patthar phenko
ye mire ghar ki nahin dard ki angna.i hai
vo jo chup-chap hai us ko nazar-andaz na kar
ḳhamushi asl men sarmaya-e-dana.i hai
Leave a Reply