matla.a-e-sub.h pe chha.i hai siyahi kaisi
shahr rah rah ke ye leta hai jamahi kaisi
qarz-e-jan aaj chuka denge magar ye to bata
zindagi main ne tire saath nibahi kaisi
muddaten guzrin vo ghar chhoḌ chuka hai phir bhi
in darichon men hai betab-nigahi kaisi
kitni mahdud thiin mazlum saron ki faslen
qatl-gahen thiin magar la-mutanahi kaisi
ittifaqat hain ai shahr-e-siyasat varna
ham faqiron ke liye masnad-e-shahi kaisi
kis qadar kaaT hai ḳhamosh-labi men ‘saghar’
jang be-tegh bhi laḌta hai sipahi kaisi
Leave a Reply