munh pher kar vo sab se gaya bhi to kya gaya
kam-baḳht saare shahr ko pagal bana gaya
patthar ko bolne ki ada.en sikha gaya
vo shaḳhs kaise kaise tamashe dikha gaya
us ko yahan se jaane ka behad malal tha
muḌ muḌ ke apne ghar ki taraf dekhta gaya
duniya-e-ḳhvab aur haqiqat ke darmiyan
thoḌa jo fasla tha use bhi miTa gaya
sab jante hue bhi main anjan hi raha
is ne samajh liya ki main dhoke men aa gaya
ye kaun de raha hai dar-e-dil pe dastaken
ye kaun mere ḳhvab ki divar Dha gaya
kuchh aur puchhne ki zarurat nahin rahi
halke se muskura ke vo sab kuchh bata gaya
de to gaya azab-e-juda.i mujhe magar
girhen jo dil men thiin vo unhen kholta gaya
koi bhi uzr-e-lang ki surat nahin rahi
lo ab tumhare samne a.ina aa gaya
jis ka har ek naqsh kaf-e-pa hai aa.ina
is rah-rau ko DhunDne ḳhud rasta gaya
Leave a Reply