vo harf harf mukammal kitab kar dega
varaq varaq ko mohabbat ka baab kar dega
ujale ke liye us ko sada lagao ab
ye kaam chuTkiyon men aftab kar dega
vo jab bhi dekhega masti bhari nazar se mujhe
mire vajud ko yaksar sharab kar dega
mujhe yaqin hai e.ajaz-e-lams se ik din
vo ḳhaar ko bhi shagufta gulab kar dega
hazar chup sahi par us ka bolta chehra
ḳhamosh rah ke hamen la-javab kar dega
vo jaisa chahega vaisa karega ai ‘hasrat’
kisi ko Thiik kisi ko ḳharab kar dega
Leave a Reply