Shayar Jamali
apni hi arzuon se ik jang hai hayat
bas yuun samajh lo dast-e-tah-e-sang hai hayat
kyon marg-e-na-gahan ko pukaren ki aj-kal
marne ka ek aur naya Dhang hai hayat
ai nasehan-e-asr jiye ja rahe ho kyon
jab jurm hai gunah hai aur nang hai hayat
hain tere baghiyon pe zamane ki ne.amaten
tere jo hain unhin pe bahut tang hai hayat
ai sakinan-e-farsh-e-gulistan idhar bhi aao
mere ufuq pe dekho lahu-rang hai hayat
apni salib apne hi shanon pe laa.e ham
hairan idhar hai maut udhar dang hai hayat
‘sha.ir’ hayat-o-maut ke rishte qadim hain
hai maut ik sukut to ahang hai hayat
Leave a Reply