chehra bata raha hai raton ko jagte ho
kaisi thakan mili hai hans kar utarte ho
kis ke qadam paḌe the kaise nishan paḌe hain
kis ke ghamon ki miTTi angan se jhaḌte ho
likkho kabhi ki mujh ko tum yaad kar rahe ho
masrufiyat ke lamhe bhi mujh pe varte ho
chhoḌa tha tum ne jaisa Thahre hue hain ab tak
aur tum gali gali men ham ko pukarte ho
ruḳhsat karo na hans kar ankhon se do dua.en
jaane pe mere aise kyon munh bigaḌte ho
taare hue hain maddham chanda chala gaya hai
yaan raat ho chuki hai tum din guzarte ho
mausam hua hai barham bechain hain faza.en
aise men tum ‘diya’ ki zulfen sanvarte ho
Leave a Reply