javani kya hui ik raat ki kahani hui
badan purana hua ruuh bhi purani hui
koi aziiz nahin ma-siva-e-zat hamen
agar hua hai to yuun jaise zindagani hui
na hogi khushk ki shayad vo laut aae phir
ye kisht guzre hue abr ki nishani hui
tum apne rang nahao main apni mauj uduun
vo baat bhuul bhi jaao jo ani-jani hui
main us ko bhuul gaya huun vo mujh ko bhuul gaya
to phir ye dil pe kyuun dastak si na-gahani hui
kahan tak aur bhala jaan ka ham ziyan karte
bichhad gaya hai to ye us ki mehrbani hui