Dayar-E-Dil Na Raha Bazm-E-Dostan Na Rahi

dayar-e-dil na raha bazm-e-dostan na rahi

amaan ki koi jagah zer-e-asman na rahi

ravan hain aaj bhi rag rag men khuun ki maujen

magar vo ek khalish vo mata-e-jan na rahi

laden ghamon ke andheron se kis ki khatir ham

koi kiran bhi to is dil men zau-fishan na rahi

main us ko dekh ke ankhon ka nuur kho baitha

ye zindagi miri ankhon se kyuun nihan na rahi

zaban mili bhi to kis vaqt be-zabanon ko

sunane ke liye jab koi dastan na rahi

Leave a Comment