ho gae muztar dekhte hi vo hilti zulfen phirti nazar ham
dete hain dil ik afat-e-jan ko thame hue hathon se jigar ham
ghair ko gar vo pyaar karenge apne lahu men honge tar ham
daal hi denge un ke qadam par kaat kar apne haath se sar ham
sulh hui to naale khinche yuun karte hain sab ko khabar ham
pitte hain siine ka dhindhora dete hain dil bar-e-digar ham
aur milenge chhod na denge sun ke sada-e-murgh-e-sahar ham
halqa donon haath ka apne daal rakhenge gird-e-kamar ham
dil ke andar tuur ke uupar chashm-e-sanam men ain haram men
teri hi surat teri hi murat pujne jaaen tujh ko kidhar ham
raaz chhupte to aghaz achchha bhed khule to anjam achchha
misl-e-sikandar bhes badal kar jaate hain ban kar nama-bar ham
andaza go kar hi chuke hain aa jaati hai mutthi men ye
aaj magar be-parda karenge dekhenge patli si kamar ham
laate hi kuchh rang-e-javani aankh se yuun kiin aankh ne baten
aao dikhaen sab ko ghaten shoabda-gar tum jadugar ham
kahti hain zulfen mushkin kas len koi jo daale haath kamar men
phail ke soo dar kya tum ko gasht karenge gird-e-kamar ham
lutf bada ho aur maza ho is ke evaz gar aap ko paaen
baith ke apne ghar ke andar dhundh rahe hain yaar ka ghar ham
tum ko nazakat aur khuda de ham ko lazzat aur khuda de
paenche tum chutki se utha lo thame hue chalte hain kamar ham
uthta joban jhukti gardan dabti baten rukti ghaten
haae na kyuun sau jaan se fida hon in charon par uth phir ham
saaya ban kar saath chalenge saath phirenge saath rahenge
apne ghar men ghair ke dil men jaao jidhar tum aaen udhar ham
jald tum uttho daud ke aao ham ko thamo ham ko sambhalo
girte hain misl-e-ashk zamin par uthte hain shakl-e-dard-e-jigar ham
sab se chhuda kar laae uda kar kya na rakhenge dil men chhupa kar
rahne basne chalne phirne tum ko khuda ka denge ghar ham
munh jo khulega ranj badhega ham se na bolo ham ko na chhedo
kahida-tan azurda-jan ashufta-dil khasta-jigar ham
ye to chhapar-khat chhota sa hai pahlu men tum sooge kyunkar
aao lita len siine par ham tum ko sula len chhati par ham
ranj gar aaya ho to bhula de pyaar badha de ham se mila de
un ki nigah se to gir to chuke hain jaaen na yarab dil se utar ham
dekh ke un ka jauban ubhra main ne kaha ye maal hai achchha
bole vo kya tum luut hi loge god men yuun aa jaaen agar ham
thahri hai baham lutf ki baazi pahle jo paae jiit usi ki
vasl ki shab hai dhundh rahe hain dil vo hamara un ki kamar ham
rose nae dil laaen kahan se aise tohfe paaen kahan se
chaat padi hai tum ko dilon ki lutne jaaen kis ka ghar ham
ghair ke bar men un ko dekha khaak men jaae aisa nazara
haath men kam-bakht aa nahin sakta todte varna tar-e-nazar ham
nashv-o-numa paai hai deccan men qadr hamari kyunkar hogi
ghar ki murghi daal barabar kis ko dikhaen apna hunar ham
kyuun na kare divana kisi ko sharm ki aadat husn ki shokhi
ho gae ‘mail’ dekh ke maail uthta joban jhukti nazar ham
Leave a Reply