Arsh Siddiqui
vaqt ka jhonka jo sab patte uḌa kar le gaya
kyuun na mujh ko bhi tire dar se uTha kar le gaya
raat apne chahne valon pe tha vo mehrban
main na jaata tha magar vo mujh ko aa kar le gaya
ek sail-e-be-aman jo asiyon ko tha saza
nek logon ke gharon ko bhi baha kar le gaya
main ne darvaza na rakkha tha ki Darta tha magar
ghar ka sarmaya vo divaren gira kar le gaya
vo ayadat ko to aaya tha magar jaate hue
apni tasviren bhi kamre se uTha kar le gaya
main jise barson ki chahat se na hasil kar saka
ek ham-saya use kal varghala kar le gaya
saj rahi thi jins jo bazar men ik umr se
kal use ik shaḳhs pardon men chhupa kar le gaya
main khaḌa fōtpath par karta raha rickshaw talash
mera dushman us ko motor men biTha kar le gaya
so raha huun men liye ḳhali lifafa haath men
us men jo mazmun tha vo qasid chura kar le gaya
raqs ke vaqfe men jab karne ko tha main arz-e-shauq
koi us ko mere pahlu se uTha kar le gaya
ai azab-e-dosti mujh ko bata mere siva
kaun tha jo tujh ko siine se laga kar le gaya
mehrban kaise kahun main ‘arsh’ us bedard ko
nuur ankhon ka jo ik jalva dikha kar le gaya
Leave a Reply