Poet
bin tire kya kahen kya rog hamen yaar laga
dar lage naam liye jis ka vo azar laga
sab ye kahte hain mujhe tujh se jo dil yaar laga
haae kya is ko javani men ye azar laga
ham divanon ka ye hai dasht-e-junun men rutba
ki qadam rakhte hi aa paanv se har khaar laga
kahiye kyunkar na use badshah-e-kishvar-e-husn
ki jahan ja ke vo baitha vahin darbar laga
qadr phir apni ho kya us ke kharidaron men
roz-o-shab jis ki gali men rahe bazar laga
kaun sa din vo kata mujh pe ki ai tegh-e-firaq
zakhm ik taaza mire dil pe na har baar laga
dil men ab us ke jo lahr aai hai ghar jaane ki
tu bhi rone ki jhadi dida-e-khun-bar laga
muttasil tu jo mira khun-e-jigar piita hai
kyuun gham-e-ishq ye kya tujh ko mazedar laga
tez-dasti-e-junun aaj hai aisi hi ki bas
na raha apne gareban men koi taar laga
is zamin men ghazal ik aur bhi padh ai ‘jurat’
khuub andaz ke ab kahne tu ashar laga
Leave a Reply