Afzal Parvez
main ne dil-e-be-tab pe jo jabr kiya hai
khuun ho ke meri ankhon se ab chhut baha hai
jis ko kisi aazar ne hai patthar se tarasha
ab shumi-e-taqdir se vo mera khuda hai
us ke sitam-o-jaur ka ehsas kise ho
us shokh ki surat hi badi hosh-ruba hai
mujh bekas-o-avara ki phir aa gai shamat
sunta huun ki basti men kahin qatl hua hai
tum un ko saza kyuun nahin dete ki jinhon ne
mujrim ka zamir aur sukun luut liya hai
ab daava-e-insaf ki auqat khulegi
khud shaikh mire shahr ka mukhtar bana hai
Leave a Reply