shaam saja ke kya karen yaad ka ehtimam bhi
bhuul ga.e hain ab to ham us ka bhala sa naam bhi
raah men rok kar use aap hain sharmsar ham
yaad hi aa nahin raha us se tha koi kaam bhi
taq-e-mizha pe zau-fishan misl-e-charagh-o-kahkashan
us ki gali ki sub.h bhi us ki gali ki shaam bhi
vaqt-e-namaz-e-ishq tha koi na pesh-o-pusht jab
ḳhud hi ko muqtadi kiya ḳhud hi bane imaam bhi
bagh-e-vatan ki shaḳh-e-sabz zard na ho kabhi agar
sazish-e-hukmaran se ghafil na rahe avaam bhi
us ne kivaḌ khol kar yuun hi gali men ki nigah
rahravon ke darmiyan Thair ga.i hai shaam bhi
mujh pe karam-navaziyan dasht ki baḌh na jaa.en kyuun
vali-e-shahr-e-ishq huun us pe tira ghulam bhi
Leave a Reply