garche gul ki sej ho tis par bhi ud jaati hai niind
sar rakhun qadmon pe jab tere mujhe aati hai niind
dekh sakta hi nahin ankhon se tuk ankhen mila
muntazir se misl-e-nargis tere sharmati hai niind
jab se ye mizhgan hue dar par tire jarub-kash
ru-ba-ru tab se miri ankhon ke tal jaati hai niind
dhyan men gul-ru ke chain aata nahin afsana-gar
le saba se gaah bu-e-yar bahlati hai niind
ashk to itne bahe ‘chanda’ ki chashm-e-khalq se
qurrat-ul-ain-e-ali ke gham men bah jaati hai niind
Leave a Reply