hamari sair ko gulshan se ku-e-yar behtar tha
nafir-e-bulbulon se nala-ha-e-zar behtar tha
anal-haq ki haqiqat ko jo ho mansur so jaane
ki us ko asman chaḌhne se chaḌhna daar behtar tha
kabhu bimar sun kar vo ayadat ko to aata tha
hamen apne bhale hone se vo azar behtar tha
tu apne man ka manka pher zahid varna kya hasil
tujhe is makr ki tasbih se zunnar behtar tha
na kahta main ki ashiq huun tira to kyuun vo ram karta
mujhe iqrar ab karne se vo inkar behtar tha
hamari aql men ghar ki giraftari se ‘hatim’ ko
kaho divana phirna kucha o bazar behtar tha
Leave a Reply