Tilism-E-Kar-E-Jahan Ka Asar Tamam Hua

Sultan Akhtar

tilism-e-kar-e-jahan ka asar tamam hua

ki ḳhaak baiTh ga.i ab safar tamam hua

bas ik sukut bikharta hua hai charon taraf

har ek ma.arka-e-ḳhair-o-shar tamam hua

kahin sakun na mila ishq se farar ke ba.ad

kisi tarah na mira dard-e-sar tamam hua

gharon men Dhalti hui raat thak ke baiTh ga.i

ki ab fasana-e-divar-o-dar tamam hua

sab apni apni ḳhabar le rahe hain vaqt-e-zaval

dilon se be-ḳhabari ka asar tamam hua

phir us ke ru-ba-ru ham dil ki baat kah na sake

hamara hausla bar-e-digar tamam hua

har ek dastan tujh se shurua hoti hai

har ek qissa tire naam par tamam hua

na koi baat mukammal hui miri ‘aḳhtar’

na koi kaam mira sar-ba-sar tamam hua