akhir ye husn chhup na sakega naqab men
sharmaoge tumhin na karo zid hijab men
pamal shokhiyon men karo tum zamin ko
dalun falak pe zalzale men iztirab men
raushan hai aftab ki nisbat charagh se
nisbat vahi hai aap men aur aftab men
dil ki girah na va hui dard-e-shab-e-visal
guzri tamam bast-o-kushad-e-naqab men
jaan main ne nama-bar ke qadam par nisar ki
tha pesh-e-pa fatada ye mazmun javab men
hans hans ke barq ko to zara kiije be-qarar
ro ro ke abr ko main dubota huun aab men
vaaiz se dar gae ki na shamil hue ham aaj
tartib-e-mahfil-e-mai-o-cha.g-o-rabab men
saaqi idhar to dekh ki ham dair-e-mast hain
kuchh masti-e-nigah bhi mila de sharab men
dakhil na dushmanon men na ahbab men shumar
madd-e-fuzul huun main tumhare hisab men
kis kis ke jaur uthaenge aage ko dekhiye
dushman hai charkh-e-pir zaman-e-shabab men
paighambar ishara-e-abru se mar gaya
phir ji uthega lab bhi hila do javab men
Leave a Reply