Nadeem Sirsivi
sarab-e-dil se musalsal fareb kha raha huun
main ek umr se apne ḳhilaf ja raha huun
yaqin-o-shak ki ajab kaifiyat se huun do-char
bichha raha huun musalla kabhi uTha raha huun
mira ghurur hai ye ḳhak-zadgi meri
main phir farishto tumhen baat ye bata raha huun
tilism-e-lafz-o-ma.ani ke pher men phans kar
ba-shakl-e-nazm-o-ghazal ḳhun-e-dil baha raha huun
ḳhiyam-e-ashk men jhulsi paḌi hai koi mushk
main apni pyaas ka qissa use suna raha huun
bhula ke saare taqaze radif-e-maut ke main
faqat hayat ka har qafiya nibha raha huun
Leave a Reply