Rahbar Jaunpuri
kya se kya ho ga.i is daur men halat ghar ki
dasht pur-nur hue baḌh ga.i zulmat ghar ki
sab ki dahlizon pe jalte hain ta.assub ke charagh
kya karega koi aise men hifazat ghar ki
ḳhamushi farz-e-rivayat inayat isar
inhen buniyadon pe mauquf hai azmat ghar ki
jin ke hisse men koi saya-e-divar nahin
vo bhi insan hain unhen bhi hai zarurat ghar ki
laakh qismat men gharib-ul-vatani ho ‘rahbar’
khinch laati hai magar phir bhi mohabbat ghar ki
Leave a Reply