Hatim Ali Mehr
duboegi buto ye jism dariya-bar paani men
banegi mauj bhi mere liye zunnar paani men
ghubar-e-dida-tar se takaddur dil ka zahir hai
tamasha hai uthi mitti ki ik divar paani men
tan-e-be-jan men jaan aai hai abru ke ishare se
bujhi thi chashma-e-haivan ki ye talvar paani men
yahi rona hai furqat men to jaan ankhon se niklegi
hai murgh-e-abi udne ke liye tayyar paani men
hamen kya ghair ke kheton pe jo abr-e-karam barsa
na aai apni janib to kabhi bauchhar paani men
tadapta huun main ro ro ke khayal-e-mushaf-rukh men
ki ghusl-e-irtimasi karte hain din-dar paani men
mire rone pe vo hanste hain to aghyar jalte hain
tilism-e-taza hai bad-gil hue finnar paani men
hue gharq-e-araq jo sharm-e-isyan se vo paak utthe
hua karte hain paida gauhar-e-shahvar paani men
na hogi abru-e-arzi to jauhar-e-zati
piyen sone ka paani bhi agar zardar paani men
jo tu aina rakh kar samne zevar pahanta hai
tiri baali ki machhli tairti hai yaar paani men
sharab-e-nab hai ik qism ka paani hai ai zahid
abas kyuun hai tujhe ai na samajh inkar paani men
latifuttaba juz rahat nahin dete kabhi iiza
nahin mumkin ki paida ho chhuri ki dhaar paani men
bana dete hain dam men saikdon gumbad hababon ke
khuda ki shaan rahte hain ajab meamar paani men
Leave a Reply