Mohammad Izhar Ul Haq
sunahri niind se kis ne mujhe bedar kar Daala
daricha khul raha tha ḳhvab men divar kar Daala
nishan honTon ka lau dene laga hai zehn men ab to
bil-aḳhir main ne us ko mish.al-e-ruḳhsar kar Daala
naqahat aur bala ka husn aur ankhon ki dil-giri
ajab bimar tha jis ne mujhe bimar kar Daala
mire dil se lipaTti zulf bhi to dekhta koi
sabhi nalan hain main ne shahr kyuun mismar kar Daala
miri utran se apni satar-poshi kar raha hai vo
mire tarz-e-ghazal ne kya use nadar kar Daala
jo ḳha.if the ghazal men zikr-e-baghdad-o-buḳhara se
vo ḳhush hon main ne ab zikr-e-lab-o-ruḳhsar kar Daala
Leave a Reply