guzar gaya vo zamana vo zakhm bhar bhi gae
safar tamam hua aur ham-safar bhi gae
usi nazar ke liye be-qarar rahte the
usi nigah ki be-tabiyon se dar bhi gae
hamari raah men saaya kahin nahin tha magar
kisi shajar ne pukara to ham thahar bhi gae
ye sail-e-ashk hai barbad kar ke chhodega
ye ghar na paoge dariya agar utar bhi gae
sahar hui to ye uqda bhi taeron pe khula
ki ashiyan hi nahin ab ke bal-o-par bhi gae
bahut aziiz thi ye zindagi magar ham log
kabhi kabhi to kisi aarzu men mar bhi gae
shajar ke saath koi barg-e-zard bhi na raha
hava chali to baharon ke nauhagar bhi gae
Leave a Reply