Farigh Bukhari
main ki ab teri hi divar ka ik saaya huun
kitne be-ḳhvab darichon se guzar aaya huun
mujh ko ehsas hai halat ki majburi ka
bevafa kah ke tujhe aap bhi sharmaya huun
mujh ko mat dekh mire zauq-e-sama.at ko to dekh
ki tire jism ki har taan pe lahraya huun
ai mo.arriḳh miri ujḌi hui surat pe na ja
shahr-e-viran huun magar vaqt ka sarmaya huun
raushni phail ga.i hai miri ḳhushbu ki tarah
main bhi jalte hue sahraon ka ham-saya huun
ham-safar laakh miri raah ka patthar bhi bane
phir bhi zehnon ke dar-o-bam pe lahraya huun
na.i manzil ka junun tohmat-e-gumrahi hai
pa-shikasta bhi tiri raah men kahlaya huun
phir numu paa.i hai ik dard-e-ḳhush-aghaz ke saath
dahr men jur.at-e-iz.har ka pairaya huun
umr bhar but-shikani karta raha aaj magar
apni hi zaat ke kohsar se Takraya huun
dahr men azmat-e-adam ka nishan huun ‘farigh’
kabhi kohsar kabhi daar pe lahraya huun
Leave a Reply