Yunus Ghazi
qaid-e-ulfat ka maza zulf-e-girah-gir men hai
bas yahi rang mire ḳhvab ki ta.abir men hai
miThi miThi si kasak us ke bhi dil men hogi
halki halki si khanak paanv ki zanjir men hai
us ko tahqir ki nazron se na dekho yaaro
rang kirdar ka pinhan miri tasvir men hai
ku-ba-ku ek tajassus liye phirta hai mujhe
ab ye daryuza-gari hi miri taqdir men hai
ḳhuun ro deta agar tujh pe ayaan ho jaata
tu ne samjha hi kya jo kuchh miri tahrir men hai
tum bhi ‘ghazi’ ki tarah dil ke evaz jaan de do
ishq-e-kamil ka maza bas isi tadbir men hai
Leave a Reply