baton men bahut gahra.i hai, lahje men baḌi sachcha.i hai
sab baten phulon jaisi hain, avaz madhur shahna.i hai
ye bunden pahli barish kii, ye sondhi ḳhushbu maaTi ki
ik koyal baagh men kuuki hai, avaz yahan tak aa.i hai
badnam bahut hai rah-guzar, ḳhamosh nazar, bechain safar
ab gard jami hai a.ankhon men aur duur talak rusva.i hai
dil ek musafir hai be-bas, jise noch rahe hain pesh-o-pas
ik dariya pichhe bahta hai aur aage gahri khaa.i hai
ab ḳhvab nahin kam-ḳhvab nahin, kuchh jiine ke asbab nahin
ab ḳhvahish ke talab pe har su mayusi ki kaa.i hai
pahle kabhi mahfil jamti thi mahfil men kahin tum hote the
ab kuchh bhi nahin yadon ke siva, bas main huun miri tanha.i hai
Leave a Reply