poet

Kis Tarah Par Aise Bad-Khu Se Safai Kijiye

kis tarah par aise bad-khu se safai kijiye

jis ki tinat men yahi ho kaj-adai kijiye

jab masiha ki ho marzi kaj-adai kijiye

is jagah kya dard-e-dil ki phir davai kijiye

us se khinch rahta huun jab tab ye kahe hai mujh se dil

ashiqi ya kijiye ya mirzai kijiye

gar ye dil apna kahe men apne hove naseha

baith kar kunj-e-qanaat men khudai kijiye

kya yahi thi shart kuchh insaf ki ai tund-khu

jo bhala ho aap se us se burai kijiye

vo bhala-changa hua bargashta mujh se aur bhi

kya bayan naale ki apne na-rasai kijiye

kha gaya laghzish qadam aisa buton ko dekh kar

ji men ye aaya ki tark-e-parsai kijiye

aks ho malum us ka ghar hi baithe ai ‘surur’

pahle zang-e-dil ki jab apne safai kijiye

More Poems

Leave a Comment