saans lena bhi saza lagta hai
ab to marna bhi rava lagta hai
koh-e-gham par se jo dekhun to mujhe
dasht aghosh-e-fana lagta hai
sar-e-bazar hai yaron ki talash
jo guzarta hai khafa lagta hai
mausam-e-gul men sar-e-shakh-e-gul
shoala bhadke to baja lagta hai
muskurata hai jo is aalam men
ba-khuda mujh ko khuda lagta hai
itna manus huun sannate se
koi bole to bura lagta hai
un se mil kar bhi na kafur hua
dard ye sab se juda lagta hai
nutq ka saath nahin deta zehn
shukr karta huun gila lagta hai
is qadar tund hai raftar-e-hayat
vaqt bhi rishta-bapa lagta hai