Sitamgari Bhi Meri Kushtagan Bhi Mere The

Zubair Rizvi

sitamgari bhi miri kushtagan bhi mere the

bayan karte hue nauha-ḳhvan bhi mere the

faza men uḌte parindon ki Daar meri thi

nishane mere the tir-o-kaman bhi mere the

vo hajv meri thi vo sab qaside mere the

tumhare baare men vahm-o-guman bhi mere the

saf-e-azizan saf-e-dushmanan bhi meri thi

vo jang meri thi sud-o-ziyan bhi mere the

safar bhi mera tha aur gard-bad mere the

vo ishq mera tha aur imtihan bhi mere the

lahu bhi mera tha aur astin bhi meri thi

vo tegh meri thi us par nishan bhi mere the

hazimaten bhi miri muḳhbiri bhi meri thi

halak hote hue pasban bhi mere the