Raushan Hon Dil Ke Dagh To Lab Par Fughan Kahan

raushan hon dil ke daagh to lab par fughan kahan

ai ham-safir atish-e-gul men dhuan kahan

hai naam ashiyan ka magar ashiyan kahan

nikhre hue hain khaak men tinke kahan kahan

uth uth ke puchhta hi raha raah ka ghubar

kahta magar ye kaun luta karvan kahan

baaqi nahin hain jaib-o-gareban ke taar bhi

likkhenge ai bahar tiri dastan kahan

ham ajnabi hain aaj bhi apne dayar men

har shakhs puchhta hai yahi tum yahan kahan

dekho ki ab hai barq-e-sitam ki nazar kidhar

puchho na ye chaman men jale ashiyan kahan

aalam guzar raha hai ajab ahl-e-dard par

ho dil men muddaa bhi to munh men zaban kahan

apni khushi vajud-e-gulistan pe ai ‘nasim’

maana ki vo sukun-e-nasheman yahan kahan

Leave a Comment