Aijaz Asad
kisi ghar ka bahut nuqsan hota hai
to daulat-mand ka saman hota hai
darun-e-dil agar iman hota hai
to phir jiina baḌa asan hota hai
hatheli par jo sar rakkhe laḌai men
usi ki jiit ka imkan hota hai
badan ka bojh ham dhote hi rahte hain
maren to ghair ka ehsan hota hai
pate ki baat kah sakta hai vo pagal
koi hushiyar bhi anjan hota hai
gharibi haath par rakhti hai khane ko
amiron ka hi dastar-ḳhvan hota hai
‘asad’ aa ja ki ham ko chain aa jaae
ye ghar tere bina sunsan hota hai
Leave a Reply