Nooh Narvi
farogh-e-husn men kya be-sabat dil ka vajud
vo aftab ye shabnam vo aag ye barud
zahe madarij-o-irfan-o-lutf-e-bazm-e-shuhud
hamin hain abd hamin abadiyat hamin ma.abud
vo baar baar mohabbat se zikr-e-ḳhair karen
shahid-e-gham ki yahi fatiha yahi hai darud
savad-e-sham-e-mohabbat hai dud-e-be-atish
tulu-e-sub.h-e-tamanna hai atish-e-be-dud
ba-lutf-o-aish-o-nishat-e-jahan mashu nazan
darin sara-e-adam ashna che-hast va che-bud
nigah-e-naz ke jauhar ye paa.e kya mumkin
fughan bhi tegh hai lekin hai tegh-e-zang-alud
uThi ghaTa ki tarah chha ga.i faza ki tarah
hudud-e-husn men tasir-e-ishq-e-na-mahdud
ḳhuda ke jalva-e-qudrat ka puchhna kya hai
jidhar jidhar nazar uTThi udhar udhar maujud
tariq-e-ishq men kyuun bar-e-gham uTha.e na dil
isi pahaḌ ke niche hai manzil-e-maqsud
tule hain phir mah-o-anjum mujhe satane par
dil-e-hazin vahi ik nala-e-falak-paimud
ghazab hua ki muqaddar mujhe vahan laaya
jahan sukun bhi napaid lutf bhi mafqud
raha ye apni hayat-o-mamat ka aalam
kabhi vajud adam tha kabhi adam tha vajud
nigah-e-naz men dil ka kuchh eqtidar nahin
agar abhi hai ye maqbul to abhi mardud
havas-o-hosh farishton ke jis se rah na saken
faza men guunj raha hai vo naghma-e-da.ud
baḌha.e vadi-e-hasrat men kya qadam koi
ki ḳhizr-e-rah bhi gum aur raah bhi masdud
farogh-e-husn taghayyur-pasand kuchh bhi nahin
ziya-e-kirmak-e-shab-tab ki hai koi numud
yahan ada-e-fara.ez ki suraten hain juda
namaz-e-ishq men vajib nahin ruku-o-sujud
payam-e-marg bhi pahuncha naved-e-zist ke saath
jo ittifaq se amrit mila to zahr-alud
vafa-o-ishq ki dushvariyan ḳhuda ki panah
ajab ajab hain shara.it ajab ajab hain quyud
tasarrufat-e-mohabbat ke sab karishme hain
nahin to kyuun ho tasadduq ayaaz par mahmud
adam se aa.e the ham aur phir adam ko ga.e
ye hai haqiqat-e-qabl-az-vajud-o-ba.ad-e-vajud
tira qalaq bhi tira dard bhi tira gham bhi
hamare ishq ke itne gavah hain maujud
ḳhuda kare ki na da.ava karen ḳhuda.i ka
suna to hoga buton ne natija-e-namrud
bashar ko quvvat-e-ehsas ne ḳharab kiya
jo ye na ho to jahan men na phir ziyan hai na suud
rah-e-talab men qadam Dagmaga.e jaate hain
sambhal ya mire allah ya mire ma.abud
nigah kard zi-qahr-o-itab fitna-gare
ba-in tavaqquf-e-andak havas-o-hosh-e-rabud
jamal-e-shahid-e-mutlaq se jis ko matlab hai
vo dil sa.iid nazar as.ad aarzu mas.ud
janab-e-‘nuh’ ko tufan-e-gham se ḳhauf nahin
ki iḳhtiyar men un ke hai kashti-e-maqsud
Leave a Reply