Karb Ki Lazzaton Ko DhunDenge

karb kī lazzatoñ ko DhūñDeñge

ham na.e mah-vashoñ ko DhūñDeñge

jo tire pyaar kā badal na baneñ

phir unhī hasratoñ ko DhūñDeñge

nīm-jāñ log chiyūñTiyoñ kī tarah

rizq ke maḳhzanoñ ko DhūñDeñge

shahr vaale to kab ke so bhī ga.e

kis liye qahqahoñ ko DhūñDeñge

be-sukūñ shaḳhs khojiyoñ kī tarah

apne apne gharoñ ko DhūñDeñge

Tahniyāñ koñpaloñ ko tarseñgī

peḌ taaza rutoñ ko DhūñDeñge

raat ke vaqt kitne sard mizāj

jism kī hiddatoñ ko DhūñDeñge

ab ‘niyāz’ apnī zard āñkhoñ meñ

ham ga.ī raunaqoñ ko DhūñDeñge

Leave a Comment