Poet
chaar din hai ye javani na bahut josh men aa
ai but-e-mast-e-mai-husn zara hosh men aa
dil ye kahta hai jo vo sham-e-ezar aa nikle
ban ke fanus pukarun mire aghosh men aa
qadam-e-yar ka avaza har ik gul par hai
amn chahe jo khizan se miri pa-posh men aa
mere sheron ke jo mushtaq hain farmate hain
dur-e-mazmun sadaf-e-lab se nikal gosh men aa
be-qarar aise sitare durr-e-ghaltan ho jaaen
aap jhamki se jo farmaen naya gosh men aa
piir huun bojh mohabbat ka uthaun kyunkar
phir javani ko pukaron ki baru dosh men aa
basar-e-pir-e-mughan ruuh tu hi hi ai ruuh
jald shishe se nikal jism-e-qadh-e-nosh men aa
baith kar yaar ke pahlu men jo uthta huun kabhi
pa-e-khvabida ye kahta hai mujhe hosh men aa
roz-e-bad ek na ik din tujhe nangiya lega
ai zari-posh ham ahbab-e-namad-posh men aa
daagh ho jaega ye taaj zari ka ai shama
ji jalane ko na khuban-e-zari-posh men aa
neamat-e-ghaib se kahti hai muhavvis ki hava
ud ke jauhar ki tarah deg se sar-posh men aa
daagh hain ek ke par kaale bhadak uthenge
dekh o fasl-e-bahari na bahut josh men aa
naql-e-mahfil nazar aata nahin koi ham men
shaikh masjid se nikal bazm-e-nai-o-nosh men aa
vasl men fasl na baaqi rahe ai jan-e-jahan
jaise pahlu men hai dil yuun mire aghosh men aa
haath aaega muqarrar vo ghazal-e-vahashi
‘bahr’ charti hai kahan aql zara hosh men aa
Leave a Reply