Muqaddar Apna Bargashta muKhaalif Aasman Apna

Poet

muqaddar apna bargashta muḳhalif asman apna

vo kya ruTha ki dushman ho gaya saara jahan apna

ilahi ho gaya be-vaj.h dushman baghban apna

kahan le jaa.en gulshan se uTha kar ashiyan apna

bigaḌ jaa.e na gulchin hai zamane ki hava bigḌi

banaya to hai bulbul shaḳh-e-gul par ashiyan apna

fasana ban ke apna ishq duniya ki zaban par hai

diya tha ham ne dil tum ko samajh kar raz-dan apna

vafa ki qadar kya hoti sitam ke ho ga.e ḳhugar

banaya un ko dushman ham ne de kar imtihan apna

ḳhuda ki zaat par ham ko to ai ‘shankar’ bharosa hai

bala se dushman-e-jan ho jo hai saara jahan apna