Badiuzzaman Khawar
aag hi kaash lag ga.i hoti
do ghaḌi ko to raushni hoti
log milte na jo naqabon men
koi surat na ajnabi hoti
puchhte jis se apna naam aisi
shahr men ek to gali hoti
baat koi kahan ḳhushi ki thi
dil ko kis baat ki ḳhushi hoti
maut jab tere iḳhtiyar men hai
mere qaabu men zindagi hoti
mahak uThta nagar nagar ‘ḳhavar’
dil ki ḳhushbu agar uḌi hoti
Leave a Reply