mohabbaton ki masafat se kaT ke dekhte kya
musafir-e-shab-e-hijran palaT ke dekhte kya
surur-e-ishq men gum ho ga.e the ham donon
hava-e-daman-e-shab se lipaT ke dekhte kya
tilism-e-yar rag o pai men Dhal raha thaa, ham
nashat o gham ke sahife ulaT ke dekhte kya
bahar-e-nau ko janam de rahi thi vasl ki shab
ham afiyat ki ruton men simaT ke dekhte kya
tha sail-e-hasrat-e-dil dushman-e-hayat magar
rah-e-baqa bhi usi men thi haT ke dekhte kya
Leave a Reply