hirasan huun siyahi men kami hoti nahin hai
charaghan kar raha huun raushni hoti nahin hai
bahut chaha ki ankhen band kar ke main bhi ji luun
magar mujh se basar yuun zindagi hoti nahin hai
lahu ka ek ik qatra pilata ja raha huun
agarche ḳhaak men paida nami hoti nahin hai
darichon ko khula rakhta huun main har-vaqt lekin
hava men pahle jaisi tazgi hoti nahin hai
main rishvat ke masa.il par namazen paḌh na paaya
badi ke saath mujh se bandagi hoti nahin hai
main apne ahd ki tasvir har-pal khinchta huun
ghalat hai sochna ye sha.iri hoti nahin hai
bura hai dushmani se ashna hona bhi ‘alam’
kisi se ab hamari dosti hoti nahin hai
Leave a Reply