Hirasan Hun Siyahi Mein Kami Hoti Nahin Hai

hirāsāñ huuñ siyāhī meñ kamī hotī nahīñ hai

charāġhāñ kar rahā huuñ raushnī hotī nahīñ hai

bahut chāhā ki āñkheñ band kar ke maiñ bhī jī luuñ

magar mujh se basar yuuñ zindagī hotī nahīñ hai

lahū kā ek ik qatra pilātā jā rahā huuñ

agarche ḳhaak meñ paidā namī hotī nahīñ hai

darīchoñ ko khulā rakhtā huuñ maiñ har-vaqt lekin

havā meñ pahle jaisī tāzgī hotī nahīñ hai

maiñ rishvat ke masā.il par namāzeñ paḌh na paayā

badī ke saath mujh se bandagī hotī nahīñ hai

maiñ apne ahd kī tasvīr har-pal khīñchtā huuñ

ġhalat hai sochnā ye shā.irī hotī nahīñ hai

burā hai dushmanī se āshnā honā bhī ‘ālam’

kisī se ab hamārī dostī hotī nahīñ hai

Leave a Comment