Tahir Adeem
hijr ki ra.ana.i mujh se chhin li
yaad ne tanha.i mujh se chhin li
aankh khulte hi tumhari yaad ne
TuTti angḌa.i mujh se chhin li
us ke honTon ki shafaq ne aaj phir
quvvat-e-goya.i mujh se chhin li
haath men us ne thamaya ik diya
aur phir bina.i mujh se chhin li
dil men jiine ki jo ḳhvahish thi kabhi
tu ne vo harja.i mujh se chhin li
dast-e-duniya ne kabhi taqdir ne
chiiz jo bhi bhaa.i mujh se chhin li
in mashinon ne mashini daur ne
ḳhubi-o-zeba.i mujh se chhin li
Leave a Reply