Shaghil Adeeb
rahzan rahon men apne jaal phailate rahe
ham magar apni hi dhun men jhumte gaate rahe
duur jitni duur tak thiin raat ki tarikiyan
duur utni duur ham rahon ko chamkate rahe
munhasir hai apne apne azm par manzil-rasi
qafile yuun to bahut aate rahe jaate rahe
har tasalli dushman-e-aram-e-jan banti ga.i
aap ke ḳhat aur dil ke zaḳhm gahrate rahe
jaane kis ke naqsh-e-pa the aane vaale qafile
har qadam par ḳhun-e-dil ke phuul barsate rahe
baḌh ga.e kuchh aur ‘shaghil’ janib-e-zindan jo ham
taqviyat kuchh aur dil ke hausle paate rahe
Leave a Reply