Hayat Madrasi
qaza ka raaz hai muzmar jo chand sanson men
hayat ka bhi ta.aruf hai chaar harfon men
charagh fan ke jala.enge ham andheron men
shu.ur fikr ki mash.al hai apne hathon men
shab-e-firaq chamakne lage dar-o-divar
mah-o-nujum bhi shamil hain mere ashkon men
abhi zamane men namrud ki ḳhuda.i hai
zara ḳhalil to aa.en ḳhuda shanason men
bala-kashon ne sambhale hain TuuTe paimane
huzur aap kahan aa.e dil-shikaston men
vo aa.ine ke muqabil bhi runuma na hua
vo ek shaḳhs jo baiTha hai chhup ke ankhon men
nazar nazar hai tasadduq tere nazaron par
nafas nafas hai charaghan miri nigahon men
agar ‘hayat’ ḳhazaf se sadaf na ban jaa.e
shumar is ka bhi hota hai sang-rezo men
Leave a Reply