ḳhar-o-ḳhas phenke chaman ke raste jaari kare
baghban fasl-e-bahar aane ki tayyari kare
dil jigar ki ya jigar dil ki aza-dari kare
ek hi aalam hai kis ki kaun gham-ḳhvari kare
mere dard-e-ishq se iiza hai saari ḳhalq ko
maut behtar hai jab itna tuul bimari kare
naza.a ho lekin na sar ke kucha-e-mahbub se
laakh ho behosh par itni tu hushyari kare
share-e-ulfat ne likkha hai kitab-e-ishq men
vasl ho ya hijr saari raat bedari kare
ai junun be-saḳhta hai afiyat madd-e-nazar
aisa aalam ho ki aalam is se be-zari kare
tere jis pahlu men baiThe dil jigar hain shaad shaad
uTh ga.e kah kar koi kis ki taraf-dari kare
ishq galiyon men phire lekin na ho parda-dari
husn parde men rahe aur garm bazari kare
Leave a Reply