is riyazat ka miri jaan sila kuchh bhi nahin
ishq ka khel shararon ke siva kuchh bhi nahin
zabt ke kaun-se ziine pe main aa pahunchi huun
haath uTThe hain magar harf-e-dua kuchh bhi nahin
ab to ḳhurshed ba-kaf ham ko ubharna hoga
in andheron men faqat ek diya kuchh bhi nahin
aise lagta tha ki duniya hi ujaḌ ja.egi
ḳhauf tha charon taraf aur hua kuchh bhi nahin
ḳhamushi ḳhud hai takallum ka vasila ‘sayyad’
dasht-e-hairat hai yahan saut-o-sada kuchh bhi nahin
Leave a Reply