tum ai ra.is! ab na agar aur magar karo
kuchh der apne saath bhi pyare! basar karo
mumkin hai zaat ka usi lamhe men ho zuhur
ik lamha ka.enat se qat-e-nazar karo
tayyara-ha-e-ahd-e-ravan hain sada-shigaf
misl-e-shua-e-nur ḳhala men safar karo
kab tak muamla ye dimaghon se shahd kaa?
tasir-e-zahr ban ke dilon men guzar karo
kab tak ḳhud apne dil men chubho.oge barchhiyan
nok-e-sinan se gumbad-e-be-dar men dar karo
milta nahin makan jo sharifon ke shahr men
uTTho tava.ifon ke gharane men ghar karo
Leave a Reply