mat puchh masiha ki main kya DhunD rahi huun
ik dard-e-musalsal ki dava DhunD rahi huun
be-saḳhta jo khol de is dil ke dariche
manus si vo ek sada DhunD rahi huun
so.e hue dil ke jo ehsas jaga de
iqbal ka vo bang-e-dara DhunD rahi huun
ai jan-e-tamanna tire daman se lipaT kar
bahte hue ashkon ka sila DhunD rahi huun
kaT jaa.en kisi taur gham-e-hijr ki raten
furqat hai magar vasl tira DhunD rahi huun
nikle na koi nuur charaghon ke badan se
main tez havaon ki rida DhunD rahi huun
Leave a Reply