Siraj Lakhnavi
tujhe pa ke tujh se juda ho ga.e ham
kahan kho diya tu ne kya ho ga.e ham
mohabbat men ik saneha ho ga.e ham
abhi the abhi jaane kya ho ga.e ham
mohabbat to ḳhud husn hai husn kaisa
ye kis vahm men mubtala ho ga.e ham
ye kya kar diya inqilab-e-mohabbat
zara a.ina la ye kya ho ga.e ham
haqiqat men banda bhi banna na aaya
samajhte hain dil men ḳhuda ho ga.e ham
qayamat tha tujh se nigahon ka milna
zamane se na-ashna ho ga.e ham
na raas aa.iin aḳhir hamen ThanDi sansen
ajab saaz the be-sada ho ga.e ham
tasavvur men bal paḌ ga.e abruon par
ye kis bevafa se ḳhafa ho ga.e ham
gudaz-e-mohabbat hamen dil bana de
bas ek aanch aur aabla ho ga.e ham
kabhi bazm-e-hasti ki raunaq hamin the
‘siraj’ ab bujha sa diya ho ga.e ham
Leave a Reply