Jamal Ehsani
samundaron ke darmiyan so ga.e
thake hue jahaz-ran so ga.e
daricha ek haule haule khul gaya
jab us gali ke sab makan so ga.e
sulagti dopahar men sab dukan-dar
khuli hi chhoḌ kar dukan so ga.e
phir aaj ik sitara jagta raha
phir aaj saat asman so ga.e
hava chali khule samundaron ke biich
thakan se chuur badban so ga.e
sahar hui to regzar jaag uTha
magar tamam sarban so ga.e
us aankh ki panah ab nahin nasib
palak palak vo sa.eban so ga.e
‘jamal’ aḳhir aisi adaten bhi kya
ki ghar men shaam hi se aan so ga.e
Leave a Reply